နေပြည်တော်၊ ဒီဇင်ဘာ ၁၂
ပြည်ထောင်စုရှေ့နေချုပ် ဦးထွန်းထွန်းဦးသည် ဂျပန်နိုင်ငံ တရားရေးရာဝန်ကြီးဌာနမှ ဒုတိယဝန်ကြီးဖြစ်သူ H.E Mr. KUROKAWA Hiromy နှင့်အဖွဲ့အား ယနေ့ မွန်းလွဲ ၁၄:၀၀ နာရီ အချိန်တွင် ပြည်ထောင်စုရှေ့နေချုပ်ရုံးရှိ သံတမန်ခန်းမ၌ လက်ခံတွေ့ဆုံ ခဲ့ပါသည်။
တွေ့ဆုံဆွေးနွေးစဉ် ပြည်ထောင်စုရှေ့နေချုပ်က တရားဥပဒေစိုးမိုးရေးနှင့် တရားမျှတမှု ကဏ္ဍ ပြုပြင်ပြောင်းလဲရေးအတွက် ဆောင်ရွက်လျက်ရှိသည့် အခြေအနေများနှင့် ပြည်ထောင်စု ရှေ့နေချုပ်ရုံး၏ ဖွဲ့စည်းပုံနှင့် လုပ်ငန်းတာဝန်များကို ရှင်းလင်းပြောကြားပြီးနောက် ပြည်ထောင်စုရှေ့နေချုပ်ရုံးနှင့် ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) တို့သည် Record of Discussion (RoD) တစ်ရပ်ကို လက်မှတ်ရေးထိုး၍ ၂၀၁၃ ခုနှစ်မှ ၂၀၁၈ ခုနှစ်အထိ Capacity Development Project ကို ပူးပေါင်းဆောင်ရွက် လျက်ရှိပါကြောင်း၊ စီမံကိန်းကာလအတွင်း JICA မှ ကျွမ်းကျင် ပညာရှင် (၃) ဦးက ပြည်ထောင်စုရှေ့နေချုပ်ရုံးတွင် တွဲဖက်လျက် လုပ်ငန်းများ ဆောင်ရွက်လျက်ရှိပါကြောင်း၊ JICA အနေဖြင့် IP Law, Security Exchange Law, Company Law စသည့် စီးပွားရေးဆိုင်ရာ ဥပဒေများ ရေးဆွဲခြင်း၊ ပြည်ထောင်စုရှေ့နေချုပ်ရုံး၏ မဟာဗျူဟာ စီမံကိန်း အကောင်အထည်ဖော်ခြင်းနှင့် ဥပဒေအရာရှိများအတွက် လုပ်ငန်းဝင်သင်တန်းနှင့် မွမ်းမံသင်တန်းများ ပို့ချခြင်းတို့တွင် ပါဝင်ကူညီ ဆောင်ရွက်ပေးလျက်ရှိပါကြောင်း၊ JICA အကူအညီဖြင့် ပညာသင်များ စေလွှတ်နိုင်ခဲ့ပါကြောင်း၊ မြန်မာနိုင်ငံ၏ ဥပဒေရေးရာကဏ္ဍ ဖွံ့ဖြိုးတိုးတက်ရေးအတွက် ပြည်ထောင်စုရှေ့နေချုပ်ရုံးနှင့် JICA တို့အကြား ဆက်လက် ပူးပေါင်းဆောင်ရွက်သွားမည်ဖြစ်ပါကြောင်း စသည်တို့ကို ဆွေးနွေးခဲ့ကြပါသည်။
တွေ့ဆုံဆွေးနွေးပွဲသို့ ပြည်ထောင်စုရှေ့နေချုပ်ရုံးမှ ဒုတိယရှေ့နေချုပ် ဦးဝင်းမြင့်၊ အမြဲတမ်းအတွင်းဝန် ဒေါ်နုနုယဉ် နှင့် ညွှန်ကြားရေးမှူးချုပ် ဒေါက်တာသီတာဦး တို့လည်း တက်ရောက်ခဲ့ကြပါသည်။